.png)
%20(820%20x%20360%20px)%20(5).png)
In September 1998 vertrek die vier Ludick-sibbe en drie maats na Ballito. Net die drieling en hul vriende keer ’n week later terug na hul tuisdorp naby Bloemfontein in die Vrystaat. Van die sprankelende dertienjarige Lara Ludick se lewe het net haar dagboek oorgebly.
Dis byna sewe-en-twintig jaar later en die Ludick-drieling – Lötter, Oscar en Duan – worstel steeds met skuldgevoelens, elk op sy eie manier.
In Junie 2025 verdwyn ’n mediese student naby Veldrus, nie ver van waar die Ludicks en hul destydse pelle grootgeword het nie. Enkele dae later word die vermiste student se pa dood in ’n huurmotor naby die Bram Fischer-lughawe gevind. Kort voor lank begin nog liggame opduik. Aan elke slagoffer se oorskulp is ’n nommer duidelik sigbaar – gemerk soos ’n bees met ’n tatoeëerklamp.
Sersant Sollie Mthembu se nuwe ondersoek lei hom terug na die onopgeloste Ludick-dossier. Om die moordenaar te stuit, en tegelyk iemand na aan hom se lewe te red, moet Sollie agter die kap van die byl kom: Is dit wraak? Of word mense stilgemaak?
Roulette is bekroonde skrywer Sidney Gilroy se vyfde roman – ’n onthutsende krimi wat die effek van familiegeheime en gevaarlike speletjies onder die vergrootglas plaas.
Wat gebeur wanneer die waarheid ná 27 jaar terugkeer?
Op dertien word Lara Ludick tydens ’n seevakansie saam met haar drielingbroers en hul vriende vermoor. Die presiese gebeure is in stilte toegesmeer - tot die waarheid, 27 jaar later, begin terugspoel. Diegene wat daar was, dra steeds die gewig van daardie somer. Geheime bly nie vir altyd begrawe nie, en wanneer dit begin spook, is geheime dodelik.
.jpg)
Oscar Ludick is die produk van sy omgewing: konserwatief. Dominant. ’n Kansvatter. ’n Man. Presies die propperse boerseun wat sy pa hom grootgemaak het om te wees. Hy is meer manhaftig as sy ander twee broers. Met sy vuiste sien hy alles rondom Erfdeel reg, maar as dit by Lara kom, breek hy.
.jpg)
Duan Ludick is die vredemaker tussen die drie van hulle. Hulle is een en dieselfde mens, maar hy bring die ewewig — die logika, die voorsorg. Lara se nalatenskap dra hy op sy mou, maar die planne vir sy eie toekoms gaan Erfdeel vir altyd verander.
.jpg)
In die nagte lê Lötter Ludick wakker oor baie dinge - maar veral oor Lara, sy broers, die plaas en wie hy tussen Erfdeel se grensdrade moet wees. Wat laat ’n man anders uitdraai? Wat dryf hom om te verander van die man wat hy glo hy altyd was, totdat hy homself nie meer in die spieël herken nie?
